السلام عليكم و رحمة الله و بركاته
مشهد أول : مبروك...جالك ولد أو بنت زي القمر^_^ ...مبروك...العملية نجحت و العيان
فاق و بيلعب كورة كمان B)
و يخرج الطبيب في خطوات سريعة برة الكادر
مشهد تاني : إحنا عملنا اللي علينا و الباقي على ربنا :blush):
و يخرج الطبيب برده بخطوات سريعة شوية برة الكادر
مشهد تالت : المريض لازم يفضل تحت الملاحظة لمدة 48 ساعة...و بعدها
تكون عدت مرحلة الخطر
و يخرج الطبيب بخطوات أسرع م اللي قبلها برة الكادر
مشهد رابع : شدوا حيلكم...البقية ف حياتكم
و يتبخر الطبيب من الكادر
دي المواقف اللي دايما بنشوفها في المسلسلات و الأفلام العربي و بنبقى
عارفين بالضبط الدكتور هيقول ايه و هيتصرف ازاي!
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
دكتور بيحكي:
أنا كنت في قسم نفسية و عصبية...
و المعتاد اني مبوجعش دماغي و آخد الحالات عشان اناقشها مع الدكتور ، لكن اللي حصل ، لقيت نفسي باخد الحالة...
كانت بنت عندها حوالي عشرين سنة و كانت حالة عصبية ....
أخدت منها التاريخ المرضي...
و مفروض بتاخد التاريخ الأسري ، بتسأل اذا كان والديها أقارب أو لأ .... يعني ولاد عم أو كده عشان في بعض الأمراض الوراثية ده بيكون له تأثير..
فقمت سألتها: والدك و والدتك متجوزين و لا لأ لقيت اللي كان قاعد وقف ، و اللي واقف قعد
و البنت لقيتها بتغطي وشها بالطرحة :blush):
بس الحمد لله عدت ، و كانت بنت طيبة من اسكندرية مش من الصعيد ولا حاجة
كانت تندهلي العيلة بتاعتها تاخد التار
و هما عرفوا ان عندي أسباب وجيهة اني مباخدش حالات و بطلوا يضغطوا عليا
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ده موقف صغير حكاه لنا واحد من داكترتنا عن دكتورة امتياز كانت رايحة تحضر أول عملية قي حياتها
ولبست واتعقمت ودخلت
ما استحملتش منظر الدم ووقعت من طولها هوب راخو الممرضات شايلينها على برة
الظريف بقى لما تتخيل منظر أهل العيان لما شافو الدكتورة اللي داخلة تعمل العملية طالعة على نقالة يبقى العيان جراله إيه؟؟
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مشكلتى الوحيدة ان فى اليوم الواحد بقابل بتاع 20 موقف كدة لسبب بسيط
هوانى ما بأقعدش ساكتة
والكلام بيولد المواقف ^_^
مثلا مواقف مع المساجين
وعلشان وجودى اليومين دول فى الحوادث باقابل مساجين كتير
و كتير جدا بيبقى التطور الطبيعى للأمور انى أنضرب
بس الحمد لله ربنا بيستر
ياإما علشان حد من زمايلى بييجى يحل محلى وينضرب هو
يا إما علشان بأهرب فى الوقت المناسب
ــــــــــــــــــــــــــــــــــــــــــــــــــــــــــــــــــــــــ
شاب
أو أقول طفل
عنده 16 سنة
التشرد بعينه
وآخد بوكس محترم فى عينه
داخل العنبر عمال يصوت ،يجعر، يزعق حاجة تشبه لكدة
رايحة جاية عمال يوجهلى كلام
ماتعبرونى
ماتيجوا تشوفونى
ايه ماحدش سائل فى ليه
عاملة نفسى مش واخدة بالى
ايه انتى طارشة ، ما بتسمعيش
لاقيت نفسى بأبص له ما اعرفش ليه
اشمعنى دى يعنى اللى سمعتيها
ــــــــــــــــــــــــــــــــــــــــــــــــــــــــــــــــــــــــــــــــــــــــ
مسجون قاعد وكأنه فى بيته بيشرب سيجارة
إذا تكرمت والله تطفى اللى فى ايديك
هو حضرتك مدام ولا آنسة
ودى بقى هتفرق مع سعادتك ايه يعنى طفى السيجارة
لأ بجد حضرتك مدام ولا آنسة
يادى اليوم اللى مش معدى يابنى طفى السيجارة وانت ساكت
القصد بس انى عايز أعرف أقولك يا ايه
يا ايه
قولى يا حاجة
طيب شوفى يا مدام ........................
ــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عادل
شاب مدمن كان بيحقن لنفسه حقنة
حقنها غلط فى الشريان بدل الوريد
طبعا عملت له انسداد فى الشريان أدى الى غرغرينة هيقطع ذراعه على أثرها
اتوسمت فيه لحظة ندم وهو فى ضعفه وقعدت ساعة اتكلم عن المخدرات والسجاير وحرام عليك شبابك وصحتك وانهاردة ضاعت ايدك بكرة هيضيع عمرك
وطول ما انا باتكلم وهو بيعيط
لغاية لما حسيت ان ذنوبه وذنوبى وذنوب العنبر كله اتغسلوا بدموعه
وبعدين خلصنا خالص
دكتورة مالاقيش معاكى كبريت
ليه ؟
هتسلق بيضة؟
لأ عايز اولع سيجارة
رحمتك يارب
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
في يوم من ذات الايام باعتباري يوما ما كنت بيوميديكال انجنيير (اصلي مهندس في 3 تخصصات ) كان الرول في المستشفي اللي كنت فيها ان غرفة العمليات بالذات في الجراحات الكبري زي القلب المفتوح والاعصاب متتفتحش الا بوجود بيوميديكال انجنير واحد علي الاقل
وقد كنت انا هذا الواحد في اول عملية قلب مفتوح احضرها في حياتي مع الدكتور عادل امام
وكان عندنا ف القسم 3 متدربين من هندسه القاهرة حضر منهم اتنين موش هنساهم ابدا لانها كانت اول واخر مره اشوفهم ف المستشفي
ولد اسمو نادر وبنت اسمها نرمين
بمجرد مالدكتور ابتدي يشق عضمة القص سمعنا علي التوالي صوت دبب ثم اوووووووووووووع واخيرا شلوهم من هنا علي ماافوقلهم
الدبب دي كانت نرمين وهي بيغمن عليها إسسعاف
اما الاوووووع فكانت نادر وهو بيفرغ اللي ف معدته بكل براءه فوق نرمين
اما شيلوهم من هنا علي ماافوقلهم مع نظر الاشمئناط القوية دي بقي كانت بتاعه دكتور عادل امام شخصيا ^_^
الحقيقه مكانش لي احتكاك بالبشر فيما عدا كدا بالذات الاخوه معتادي الاجرام لاننا كنا مستشفي استثماري اولا وثانيا لاني كنت مستمتع بوجودي ف جناح العمليات (اللي كل البيوميديكال انجنييرز كانو بيهربو منو معرفش ليه) وبالتالي مكنتش بشوف بشر الا وهم في البنج ^_^
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انا بقي كنت في امتحان الباطنه و كنا خمسه علي الحاله في الكشف ,الاربعه التانين كانو ماشاء الله امتيازوانا بصراحه متدلعه اوييييييييييييييي بس و الله الكل بيحبني مووت حتي دكاترتي,المهم انا قلت بدل ما ادخل العنبر واقرف نفسي ابقي انقل منهم (الاربعه) البيانات و اشخص بمعرفتي..
وفعلا نقلتها و استغربت ان الحاله واضحه زي الشمس و العيال دول مش عارفينها , قولت يمكن من كتر ماهي ساهله مش مصدقين روحت كاتبه التشخيص و جري علي الدوكتور قال يعني علشان اكسب بونط عنده .......
الدوكتور قري التشخيص و راح منادي الدفعه كللها و طلب منهم يسقفولي وفعلا سقفو و اختكم ايه طاوووووس والله
وقعد ربع ساعه يمدح فيا
وبعدين صوته اتغير واتحشرج قولت ايه ده هو حيعيط من فرحته بيا ولا ايه
و فجأه و ب اعلي صوت رهح قايل
الهانم مشخصه الحاله حمل و هي راجل .
اتاري ولاد الايه كانو بيقولو هي هي علي الحاله و انا افتكرتهم بيقولو هي لانها ست والدكنور ده دلوقتي صاحبي جدا
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
موضوع: الأطباء و المقالب 
الجمعة فبراير 27, 2009 5:47 am
